കടക്കെണിയിൽപ്പെട്ടതുകൊണ്ടും അന്യായ സെക്യൂരിഅടയ്ക്കാൻ നിർവ്വാഹമില്ലാതിരുന്നതു കൊണ്ടും 2023 മുതൽ ലൈസൻസ് പുതുക്കാൻ കഴിയാതിരുന്ന കുറെയധികം കരാറുകാരുണ്ട്. അലസത കൊണ്ടോ, ഉപേക്ഷ കൊണ്ടോ ആരും ലൈസൻസ് പുതുക്കാതിരിക്കില്ല. കാരണം ലൈസൻസ് കരാറുകാരന്റെ ഐഡന്റിറ്റിയാണ്. അതില്ലെങ്കിൽ തൊഴിലിൽ തുടരാനാവില്ല. നിലവിലുളള പ്രവർത്തികൾ പോലും പൂർത്തിയാക്കാനാവില്ല.
അപ്പോൾ എന്തുകൊണ്ട് പകുതിയിലേറെ A, B ക്ലാസ്സ് കരാറുകാർ ലൈസൻസ് പുതുക്കിയില്ല?
- ഒന്നാമത് ഭീമമായ കടം.
- മെഷിനറി കളും ടിപ്പറുകളും വിറ്റുതുലയ്ക്കേണ്ടി വരുന്നു.
- ജി.എസ്.ടി യിലെ പിഴയും പിഴ പലിശയും മൂലമുള്ള ബാധ്യതകൾ.
- പ്രയോജനമുള്ള പണികളൊക്കെ ഊരാളുങ്കലിനും അക്രെഡിറ്റഡ് ഏജൻസികൾക്കും ടെണ്ടറില്ലാതെ നൽകപ്പെടുന്നു.
- ടെണ്ടർ നടന്നാൽ, വൻ ആനുകൂല്യങ്ങളോടുകൂടി മത്സരിക്കാൻ എത്തുന്നവരെ നേരിടാൻ സാധാരണ കരാറുകാർക്ക്കഴിയുന്നില്ല.
- കഷ്ടപ്പെട്ട് പണിതീർത്താൽ, പണം ഇല്ല.
- വൈകി അനുവദിക്കുന്ന ബിൽ തുകയ്ക്ക് വീണ്ടും ട്രഷറി നിയന്ത്രണം !
ജീവിതായോധനത്തിനുള്ള ആശ്രയിക്കാവുന്ന തൊഴിലായി ആർക്കും കരാർപണിയെ കാണാനാവുന്നില്ല. ചുവപ്പുനാടയുടെ കുരുക്കിൽപ്പെട്ട് ജീവൻ നഷ്ടപ്പെട്ടവരും വീടു നഷ്ടപ്പെട്ടവരും അനവധി. പുതിയ ചെറുപ്പക്കാർ കടന്നുവരുന്നില്ല. പുതിയ സർക്കാർ ഒട്ടേറെപ്പേർക്ക് പ്രതീക്ഷ നൽകി. തിരിച്ചു വന്നാലോ എന്ന ചിന്ത പലരിലും അങ്കുരിച്ചു. മന്ത്രി തല ചർച്ചകൾ പ്രതീക്ഷ വർദ്ധിപ്പിച്ചു. ഉത്തരവ് വന്നപ്പോൾ ഞെട്ടി.
താഴെ കൊടുത്തിരിക്കുന്ന പൊതുമരാമത്ത് (H) വകുപ്പിന്റെ ഉത്തരവ് , സ.ഉ. (സാധാ ) നം.1298 / 2026 (PWD )നോക്കൂ.
2023 – ൽ പുതുക്കാൻ കഴിയാതിരുന്ന ലൈസൻസ് പുതുക്കണമെങ്കിൽ അന്നത്തെ പിഴയുടെ മുപ്പത് ഇരട്ടി “പിഴ” യായി കരാറുകാരൻ നൽകണം.
പണി തീർന്നാൽ, ഇഷ്ടമുള്ളപ്പോഴെ പണം തരുകയുള്ളുവെന്നും യാതാരു പലിശയും നഷ്ടപരിഹാരവും നൽകില്ലെന്നും പറയുന്ന സർക്കാരാണ്. ആദ്യ പിഴയുടെ മുപ്പതിരട്ടി പിഴ ചുമത്തി ക്കൊണ്ട് ഉത്തരവിറക്കിയിരിക്കുന്നത്.
ഇതിനെ ജനാധിപത്യമെന്ന് ആരെങ്കിലും വിളിക്കുമോ?
നിർമ്മാണ മേഖലയിലെ അനീതികൾ അവസാനിപ്പിക്കണമെന്ന ആവശ്യം ശക്തമായി ക്കൊണ്ടിരിക്കുമ്പോഴാണ്, ഇടിത്തീ പോലൊരു ഉത്തരവ്. കേരള നിർമ്മാണമേഖലയിലെ ബഹുഭൂരിപക്ഷം കരാറുകാരും കടക്കെണിയിലാണ്. അവർക്കു വേണ്ടി കടാശ്വാസ പദ്ധതി നടപ്പാക്കണമെന്ന ആവശ്യം അനുഭാവ പൂർവ്വം പരിഗണിക്കാമെന്ന് മുഖ്യമന്ത്രി ഉറപ്പ് നൽ കുമ്പോഴാണ്, ഷെയ്ക്ക്സ്പീയറുടെ കഥാപാത്രമായ ഷൈലോക്കിനെ വെല്ലുന്ന ഉത്തരവുമായി പൊതുമരാമത്ത് വകുപ്പ് വന്നിരിക്കുന്നത്.
നിർമ്മാണ മേഖല “നേരെ ചൊവ്വേ” പ്രവർത്തിക്കണമെങ്കിൽ, സന്തുലിത കരാർ വ്യവസ്ഥകളും കൃത്യമായ പേമെന്റ് ഷെഡ്യൂളും ആവശ്യമാണ്.
A- ക്ലാസിൽ തുടരാൻ നിർവ്വാഹമില്ലാത്തവർക്ക് B യിലേയ്ക്കാ, C യിലേയ്ക്കാ സ്വയം മാറാനുള്ള ഡൗൺ ഗ്രേഡിംഗ് അനുവദിക്കണം. ലൈസൻസ് ഉപയോഗിച്ച് കമ്പനിയുണ്ടാക്കി ശാക്തീകരണം നടത്താനും അനുമതി നൽകണം. മരാമത്ത് മാന്വൽ പരിഷ്ക്കരിക്കുന്നതിനുള്ള നടപടികൾ ധൃതഗതിയിൽ നടത്തുന്ന മന്ത്രി പി.കെ. ബഷീറിനെയും വകുപ്പ് സെക്രട്ടറി, ചീഫ് എഞ്ചിനിയറന്മാർ തുടങ്ങിയവരെയും അഭിനന്ദിക്കുന്നു. സംരംഭക സൗഹൃദമായ മാന്വലും കരാർ വുവസ്ഥകളും നടപ്പിൽ വരുമെന്ന് വിശ്വസിക്കുന്നു. അന്യായ ഉത്തരവ് തിരുത്തണം.
വർഗീസ് കണ്ണമ്പള്ളി
